လူကြီးဝေဒနာ ဒူးပြဿနာ

ဒူးခေါင်းဆိုတာ ခန္ဓာကိုယ်မှာ အကြီးဆုံး အဆစ်ဖြစ်သလို လမ်းလျှောက်တာ လှေကားတက်တာ စတဲ့လှုပ်ရှားမှုတွေမှာ တစ်ကိုယ်လုံးရဲ့အလေးချိန်အသက်ရောက်ဆုံးနေရာလဲဖြစ်ပါတယ်။

ဒါကြောင့်ထိခိုက်ဒဏ်ရာရတာဖြစ်လွယ်သလို အသက်ရလာတာနဲ့အမျှ လူကြီးပိုင်း တွေမှာ ဒူးနာဝေဒနာခံစားလာရတဲ့သူအတော်များပါတယ်။

သက်လတ်ပိုင်းနဲ့ သက်ကြီးပိုင်းအရွယ်တွေမှာ အဆစ်ကြားမှာရှိတဲ့ အရိုးနုတွေပျက်စီးတာကြောင့် အရိုးအချင်းချင်းပွတ်တိုက်မှုများရာက အဆစ်ရောင်ပြီး အရိုးအဆစ်အမြစ်ရောင်ရောဂါ ကြောင့် ဒူးနာဝေဒနာခံစားရလေ့ရှိပါတယ်။

ကိုယ်အလေးချိန်များတဲ့သူ၊ အဆစ်ဒဏ်ဖြစ်အောင် လှုပ်ရှားမှုများတဲ့သူတွေ၊ အရိုးအဆစ်ရောင်ရောဂါမိသားစုမျိုးရိုးရှိသူမှာ ပိုဖြစ်နိုင်ပါတယ်။

ဒီလိုအဆစ်ရောင်ရောဂါ ကြောင့် ဒူးနာတာကိုကာကွယ်ဖို့ မဖြစ်လာခင်တည်းက ဒီအချက်တွေလိုက်နာဖို့လိုအပ်ပါတယ်။

၁။ ရောင်ရမ်းတာကိုအားပေးတဲ့ အသင့်စားအစားအသောက်တွေကိုရှောင်ပါ။

၂။ ဒူးဆစ်လှုပ်ရှားမှုထိန်းပေးနိုင်ဖို့ ပေါင်နဲ့ ခြေသလုံးကြွက်သားသန်မာအောင်လေ့ကျင့်ပါ။

၃။ အရိုးနုတွေမှာ ရေဓာတ်ပမာဏများတာကြောင့် ဆိုဒါနဲ့ Energy Drinks အချိုရည်တွေကိုလျှော့ပြီး အရိုးနုကျန်းမာအောင် ရေများများသောက်ပါ။

၄။ ဆေးလိပ်သောက်ခြင်းက ရောင်ရမ်းတာတွေကိုအားပေးတာဖြစ်လို့ ရှောင်ဖို့လိုပါတယ်။

၅။ ကိုယ်အလေးချိန်များတဲ့အခါ ဒူးဆစ်မှာ ဖိအားပိုဖြစ်စေနိုင်လို့ ကိုယ်အလေးချိန်ထိန်းဖို့လဲလိုအပ်ပါတယ်။

၆။ ဒူးနာဝေဒနာခံစားနေရပြီ ဆိုရင်လဲ ဆောင့်ကြောင့်ထိုင်တာ၊ မာတဲ့မျက်နှာပြင်ပေါ်မှာ ကြာကြာထိုင်တာမျိုးက ဒူးနာတာကိုပိုဆိုးစေနိုင်ပါတယ်။ ဖိနပ်အပျော့(သို့) ကူရှင်ပါတဲ့ဖိနပ်တွေကိုစီးသင့်ပါတယ်။

၇။ ဒူးနာလို့ဆိုပြီး မလှုပ်မရှားပဲနေတာမျိုးလဲ မလုပ်သင့်ပါဘူး။ ဒူးဆစ်သန်မာဖို့ လှုပ်ရှားမှုရှိဖို့လည်းလိုအပ်တာမို့ ဒူးကိုဒဏ်ဖြစ်စေမယ့် ပြေးတာမျိုးမဟုတ်ဘဲ ရေကူးတာ၊ ယောဂဆော့တာ၊ လမ်းလျှောက်တာမျိုးလို ပေါ့ပေါ့ပါးပါးဖြစ်မယ့် လေ့ကျင့်ခန်းမျိုးကို ရွေးချယ်နိုင်ပါတယ်။

၈။ ဒူးနာတာ မခံမရပ်အောင်ဖြစ်လာပြီး ရက်အတော်ကြာ နာနေတာမျိုးဖြစ်လာရင်တော့ ထိရောက်တဲ့ကုသမှုခံယူနိုင်ဖို့ ဆရာဝန်နဲ့ပြသ တိုင်ပင်ဖို့ အကြံပြုလိုက်ပါတယ်။