မိန်းမကိုယ် ယားယံ တာတွေဟာ ဘာကြောင့်ဖြစ်နိုင်လဲ…

‍♀️ မိန်းမကိုယ် ယားယံတာဟာ မိန်းကလေးတွေအတွက်တော့ အတော့်ကိုနေရခက်ပြီး သက်တောင့်သက်သာမဖြစ်စေတဲ့အရာတစ်ခုပါ။ ဒီလိုယားယံမှုတွေဟာ ဘာတွေကြောင့်ဖြစ်နိုင်လဲဆိုရင်….

1) ဓာတ်မတည့်တာကြောင့်
တခါတလေကျ မိန်းမကိုယ် ယားယံတာဟာ
ဆပ်ပြာတွေ၊ မိန်းမကိုယ်သန့်ရှင်းရေးလုပ်တဲ့ဟာတွေ၊ အနံ့ပါတဲ့ toilet paper တွေ၊ cream တွေနဲ့ဓာတ်မတည့်လို့ allergic ဖြစ်ပြီးယားယံတာမျိုးဖြစ်တတ်ပါတယ်။

2)ဆီးချိုဖြစ်နေတာကြောင့်
မိန်းမကိုယ်ယားယံတယ်ဆိုရင် ဆီးချိုရောဂါကိုလည်း မေ့ထားလို့မရနိုင်ပါဘူး။ သွေးတွင်းအချိုဓာတ်တွေတက်ပြီး ဆီးချိုရောဂါရှိလာတဲ့အခါ မိန်းမကိုယ်ယားယံတာမျိုးဖြစ်တတ်ပါတယ်။ ဆီးချိုရဲ့ တခြားလက္ခဏာတွေကိုတော့ ကြည့်ဖို့လိုပါလိမ့်မယ်။

3)မှိုပိုးဝင်တာကြောင့်၊ ဘက်တီးရီးယားပိုးဝင်တာကြောင့်
 ဒီမိန်းမကိုယ်ကို တစေးပိုး(မှိုပိုး)ဝင်တာဟာ မိန်းကလေးတော်တော်များများကြားမှာ အဖြစ်များတတ်ကြပါတယ်။ အများအားဖြင့် ပိုးသတ်ဆေးတွေသောက်သုံးပြီးတဲ့အခါ ကောင်းတဲ့ ဘက်တီးရီးယားတွေသေပြီး ဒီမှိုပိုး
တွေဟာ ဝင်ရောက်လာတတ်ပါတယ်။ ဘက်တီးရီးယားပိုးဝင်လို့ဖြစ်တဲ့ယားယံတာကလည်း ထိုနည်း၎င်းပါပဲ။ ဘက်တီးရီးယားပိုးဝင်လို့ဖြစ်တာမှာတော့ ​ငါးညှီနံ့လို အနံ့ဆိုးဆိုးအဖြူရည်တွေဆင်းတတ်ပါသေးတယ်။

4)လိင်ကတစ်ဆင့်ကူးစက်ရောဂါတွေကြောင့်
 လိင်ကတစ်ဆင့်ကူးစက်နိုင်တဲ့ ဆီးပူညောင်းကျရောဂါ၊ လိင်မှာဖြစ်တဲ့ ကြွက်နို့၊
ရေယုန် စတဲ့ရောဂါတွေမှာလည်း မိန်းမကိုယ်ယားယံတာဖြစ်နိုင်ပါတယ်။

5)စိတ်ဖိစီးမှုနဲ့ သွေးဆုံးတာကြောင့်
 စိတ်ဖိစီးတဲ့အခါ ကိုယ်ခံအားကျပြီး ရောဂါပိုးတွေအလွယ်တကူဝင်ရောက်နိုင်လို့ ယားယံတာဖြစ်နိုင်ပါတယ်။ ထို့ပြင် အမျိုးသမီးတွေသွေးဆုံးတဲ့အခါ မ ဟော်မုန်းကျဆင်းသွားတာကြောင့် မိန်းမကိုယ်ခြောက်သွေ့ပြီး ယားယံတာလည်းဖြစ်နိုင်ပါတယ်။

6)မိန်းမကိုယ်အဝမှာကင်ဆာဖြစ်တာကြောင့်
 မိန်းမကိုယ်အဝမှာ ကင်ဆာဖြစ်တာဟာ ရှားပါးပြီး ရောဂါလက္ခဏာသိပ်မပြတတ်ပေမယ့် ရောဂါလက္ခဏာပြပြီဆိုရင်လည်း မိန်းမကိုယ်ယားယံတာ၊ နာကျင်တာ၊ ပုံမှန်မဟုတ်ပဲသွေးဆင်းတာတွေနဲ့လာတတ်ပါတယ်။

ဒေါက်တာကြယ်စင်သစ်