ကိုယ့်ကိုယ်ကို ချစ်တတ်ဖို့

ကိုယ့်ကိုယ်ကို ချစ်မြတ်နိုးတယ်ဆိုတာ လူတိုင်းအတွက် အင်မတန်အရေးကြီးတဲ့ ခံစားချက်တစ်မျိုးဖြစ်ပြီး စိတ်ပိုင်းဆိုင်ရာ၊ ရုပ်ပိုင်းဆိုင်ရာနဲ့ လူမှုရေးဘဝတွေအပေါ်မှာ အများကြီး သက်ရောက်မှုရှိပါတယ်။ ဒါကြောင့် ကိုယ့်ကိုယ်ကို ချစ်တတ်ဖို့ ဘာကြောင့်အရေးကြီးလဲ၊ ကိုယ့်ကိုယ်ကို ချစ်တတ်အောင် ဘယ်လိုနေထိုင်ရမလဲဆိုတာကို ဖတ်ကြည့်ရအောင်။

ကိုယ့်ကိုယ်ကို ချစ်တတ်ဖို့ ဘာကြောင့်အရေးကြီးလဲ။ 

• မိမိကိုယ်ကို တန်ဖိုးထားတတ်ဖို့ 

ကိုယ့်ကိုယ်ကို ချစ်တဲ့အခါ ကိုယ့်ရဲ့တန်ဖိုးကို သိလာပြီး ကိုယ့်မှာရှိတဲ့ အရည်အချင်းတွေ၊ လုပ်နိုင်စွမ်းတွေကို ယုံကြည်လာပါတယ်။ ကိုယ့်ကိုယ်ကို တန်ဖိုးထားတဲ့အတွက် ဘယ်အရာကိုမဆို ယုံကြည်မှုအပြည့်နဲ့ ရင်ဆိုင်နိုင်ပါလိမ့်မယ်။

• စိတ်ကျန်းမာဖို့ 

မိမိကိုယ်ကို ချစ်မြတ်နိုးတဲ့သူဟာ စိတ်ဖိစီးမှုတွေ၊ စိုးရိမ်ပူပန်မှုတွေနဲ့ အဆိုးမြင်စိတ်တွေကို လျှော့ချနိုင်ပါတယ်။ ကိုယ့်ကိုယ်ကို အားပေးတတ်တဲ့အတွက် စိတ်ဓာတ်ကျတဲ့အခါ အလွယ်တကူ ပြန်ထနိုင်ပြီး စိတ်ကျန်းမာပျော်ရွှင်တဲ့ဘဝကို ပိုင်ဆိုင်နိုင်ပါလိမ့်မယ်။

• ရုပ်ပိုင်းဆိုင်ရာ ကျန်းမာဖို့ 

စိတ်နဲ့ကိုယ်ဟာ ဆက်စပ်နေတဲ့အတွက် ကိုယ့်ကိုယ်ကို ချစ်တဲ့အခါ ကိုယ့်ရဲ့ကျန်းမာရေးကို ဂရုစိုက်လာတတ်ပါမယ်။ အာဟာရပြည့်ဝတဲ့ အစားအစာတွေကို စားဖြစ်မယ်၊ လေ့ကျင့်ခန်းပုံမှန်လုပ်ဖြစ်မယ်၊ အိပ်ရေးဝဝအိပ်ဖြစ်မယ်။ ကိုယ့်ရဲ့ ရုပ်ပိုင်းဆိုင်ရာကို ဂရုစိုက်တာဟာ ကိုယ့်ကိုယ်ကို ချစ်တဲ့နည်းလမ်းတစ်ခုပါပဲ။

• ဆက်ဆံရေးတွေ တိုးတက်ကောင်းမွန်လာဖို့

ကိုယ့်ကိုယ်ကို ချစ်တဲ့သူဟာ သူတစ်ပါးကိုလည်း ချစ်နိုင်ပါတယ်။ ကိုယ့်ကိုယ်ကို တန်ဖိုးထားတဲ့အတွက် သူတစ်ပါးကိုလည်း လေးစားတတ်တယ်။ အဲဒီအခါမှာ ပိုကောင်းတဲ့ ဆက်ဆံရေးတွေကို တည်ဆောက်နိုင်ပြီး သူငယ်ချင်းတွေ၊ မိသားစုတွေနဲ့ ပိုမိုနားလည်မှုရှိတဲ့ ဆက်ဆံရေးကို ပိုင်ဆိုင်နိုင်ပါတယ်။

• ရည်မှန်းချက်တွေ အောင်မြင်နိုင်ဖို့

ကိုယ့်ကိုယ်ကို ချစ်ပြီး ယုံကြည်မှုရှိတဲ့အခါ ဘယ်အရာကိုမဆို လုပ်နိုင်တယ်လို့ ခံယူမိပါလိမ့်မယ်။ ဒီယုံကြည်မှုက ကိုယ့်ရဲ့ရည်မှန်းချက်တွေကို အောင်မြင်အောင် တွန်းအားပေးတဲ့အရာပါပဲ။ အခက်အခဲတွေကို ကျော်လွှားနိုင်ပြီး ကိုယ်လိုချင်တဲ့ဘဝကို ရောက်အောင် ကြိုးစားနိုင်ပါလိမ့်မယ်။ 

ကိုယ့်ကိုယ်ကို ချစ်တတ်ဖို့ ဘယ်လိုကြိုးစားရမလဲ။ 

• ကိုယ့်ကိုယ်ကို ခွင့်လွှတ်ပါ

အတိတ်မှာ မှားခဲ့တဲ့အရာတွေကိုပဲ စဉ်းစားမနေဘဲ ကိုယ့်ကိုယ်ကို ခွင့်လွှတ်ပြီး အမှားတွေကနေ သင်ခန်းစာယူပါ။ အနာဂတ်မှာ အဲဒီအမှားမျိုးတွေ ထပ်မဖြစ်အောင် ဂရုစိုက်ပါ။

•  ကိုယ့်ရဲ့ အားသာချက်တွေကို ရှာဖွေပါ

ကိုယ်ဘာကို ဝါသနာပါလဲ၊ ဘာကိုလုပ်ရတာ ပျော်လဲဆိုတာကို ရှာဖွေပြီးရင် အဲဒီအရည်အချင်းတွေကို ပိုပြီးတိုးတက်အောင် လုပ်ပါ။

• ကိုယ့်ကိုယ်ကို ဂရုစိုက်ပါ

ကိုယ့်ရဲ့ စိတ်ပိုင်းဆိုင်ရာနဲ့ ရုပ်ပိုင်းဆိုင်ရာကို ဂရုစိုက်ပါ။ အာဟာရပြည့်ဝတဲ့ အစားအစာတွေကို စားပါ၊ လေ့ကျင့်ခန်းပုံမှန်လုပ်ပါ၊ အိပ်ရေးဝဝအိပ်ပါ။  

• ကိုယ့်ကိုယ်ကို အားပေးပါ

 ကိုယ်လုပ်နိုင်တယ်၊ ကိုယ်တော်တယ်လို့ ပြောရင်း ကိုယ့်ကိုယ်ကို အားပေးပါ။ ကိုယ့်ရဲ့အောင်မြင်မှုတွေကို မှတ်တမ်းတင်ထားပြီး ကိုယ့်ကိုယ်ကို ဂုဏ်ယူပါ။

• အဆိပ်အတောက်ဖြစ်စေတဲ့ ဆက်ဆံရေးတွေကို ရှောင်ပါ

ကိုယ့်ကို အမြဲဝေဖန်နေတဲ့သူတွေ၊ အဆိုးမြင်စိတ်တွေနဲ့ပဲ ပြောနေတဲ့သူတွေကို တတ်နိုင်သလောက် ရှောင်ပါ။ ကိုယ့်ကို အားပေးတဲ့သူတွေ၊ ကိုယ့်ကိုတန်ဖိုးထားတဲ့သူတွေနဲ့ ပေါင်းသင်းပါ။

• ကျေးဇူးတင်တတ်တဲ့စိတ်ကို မွေးမြူပါ

ကိုယ့်မှာရှိတဲ့အရာတွေအတွက် ကျေးဇူးတင်ပါ။ ကိုယ့်ရဲ့မိသားစု၊ သူငယ်ချင်းတွေ၊ အလုပ်အကိုင်နဲ့ ကိုယ်ပိုင်ဆိုင်ထားတဲ့အရာတွေအတွက် ကျေးဇူးတင်ပါ။ နေ့တိုင်း ကျေးဇူးတင်စရာအကြောင်းတွေကို စဉ်းစားပြီး မှတ်တမ်းတင်ပါ။

• ကိုယ့်ရဲ့လိုအပ်ချက်တွေကို သိပါ

ကိုယ်ဘာလိုအပ်လဲဆိုတာကို သိအောင်လုပ်ပါ။ ကိုယ့်ရဲ့လိုအပ်ချက်တွေကို ဖြည့်ဆည်းပေးနိုင်မှ ကိုယ့်ကိုယ်ကို ကောင်းကောင်းချစ်နိုင်မှာပါ။

• ကိုယ့်အတွက် အချိန်ပေးပါ

တစ်နေ့တာမှာ ကိုယ့်အတွက် သီးသန့်အချိန်ပေးပါ။ ကိုယ်ဘာလုပ်ချင်လဲ၊ ဘာကိုဝါသနာပါလဲဆိုတာကို လုပ်ပါ။ ကိုယ့်ရဲ့စိတ်ကို အပန်းဖြေပေးပြီး ပျော်ရွှင်မှုကို ရှာဖွေပါ။

• အသစ်အဆန်းတွေကို လေ့လာသင်ယူပါ

အသစ်အဆန်းတွေကို လေ့လာသင်ယူတာဟာ ဦးနှောက်ကို တက်ကြွစေပြီး ကိုယ့်ကိုယ်ကို ယုံကြည်မှုရှိစေပါတယ်။ သင်တန်းတွေတက်တာ၊ စာအုပ်တွေဖတ်တာ၊ အွန်လိုင်းကနေ လေ့လာတာတွေ လုပ်နိုင်ပါတယ်။

ကိုယ့်ကိုယ်ကို ချစ်တတ်ဖို့ဆိုတာ ခဏတာမဟုတ်ဘဲ တစ်သက်တာလုံး လေ့ကျင့်ပျိုးထောင်သွားရင်း အကောင်းဆုံးနေထိုင်သွားရမှာဖြစ်ပါတယ်။ မိမိကိုယ်ကို ချစ်တဲ့အခါ ပိုပြီးပျော်ရွှင်တဲ့ဘဝ၊ အောင်မြင်တဲ့ဘဝနဲ့ ကျန်းမာတဲ့ဘဝကို ပိုင်ဆိုင်နိုင်ပါလိမ့်မယ်။