ယောဂ ရဲ့ ကျန်းမာရေးအကျိုးကျေးဇူးများ

အသက်အရွယ်မရွေး၊ ကျားမ မရွေး ပြုလုပ်ဖို့သင့်တော်ပြီး ကျန်းမာရေးအကျိုးကျေးဇူးများစွာ ရရှိစေတဲ့ လေ့ကျင့်မှုတစ်ခုက ယောဂ ပဲဖြစ်ပါတယ်။ ယောဂကို လေ့ကျင့်တဲ့အခါ ခန္ဓာကိုယ်တစ်ခုလုံးကို လှုပ်ရှားပေးပြီး အာရုံစူးစိုက်မှုကို တိုးတက်စေတဲ့အတွက် စိတ်ရောကိုယ်ပါ ကျန်းမာလာစေနိုင်ပါတယ်။

ယောဂရဲ့ ကျန်းမာရေးအကျိုးကျေးဇူး (၁၀ခု) 

•  စိတ်ဖိစီးမှုကို လျှော့ချပေးခြင်း

ယောဂရဲ့ အဓိက အကျိုးကျေးဇူးတစ်ခုကတော့ စိတ်ဖိစီးမှုကို လျှော့ချပေးနိုင်ခြင်းပဲဖြစ်ပါတယ်။ ယောဂလေ့ကျင့်ခန်းတွေဟာ စိတ်ကို တည်ငြိမ်စေပြီး စိတ်ဖိစီးမှုဟော်မုန်းတွေကို လျှော့ချပေးနိုင်ပါတယ်။ အသက်ရှူသွင်းရှူထုတ်နဲ့ တွဲပြီး လေ့ကျင့်ရတာကြောင့် အာရုံကြောစနစ်ကို ငြိမ်သက်စေပြီး စိတ်ဖိစီးမှုကို လျော့ပါးစေပါတယ်။ 

• ခန္ဓာကိုယ်ကို ပျော့ပျောင်းစေပြီး ကြွက်သားတွေကို သန်မာစေခြင်း

ယောဂကျင့်စဉ်တွေဟာ ခန္ဓာကိုယ်ကို ဆန့်ထုတ်ပေးပြီး ကြွက်သားတွေကို သန်မာစေပါတယ်။ ပုံမှန် ယောဂလေ့ကျင့်ခြင်းဖြင့် ခန္ဓာကိုယ်ရဲ့ လှုပ်ရှားနိုင်စွမ်းကို တိုးတက်စေပြီး ခန္ဓာကိုယ်တစ်ခုလုံးကို ပျော့ပျောင်းစေပါတယ်။ ခန္ဓာကိုယ်ရဲ့ အနေအထားကို မှန်ကန်စေပြီး ခါးနာခြင်းနဲ့ အခြားသော ခန္ဓာကိုယ်နာကျင်ကိုက်ခဲမှုတွေကို သက်သာစေပါတယ်။

•  အသက်ရှူလမ်းကြောင်းကို ကျန်းမာစေခြင်း

ယောဂမှာ အသက်ရှူလေ့ကျင့်ခန်းတွေ ပါဝင်တာကြောင့် အသက်ရှူလမ်းကြောင်းကို ကောင်းမွန်စေပါတယ်။ အဆုတ်ရဲ့ လုပ်ဆောင်နိုင်စွမ်းကို တိုးတက်စေပြီး ခန္ဓာကိုယ်ထဲကို အောက်ဆီဂျင် ပိုမိုရောက်ရှိစေပါတယ်။ 

• နှလုံးကျန်းမာရေးကို ကောင်းမွန်စေခြင်း

 ယောဂလေ့ကျင့်ခန်းတွေဟာ သွေးဖိအားကို လျှော့ချပေးနိုင်ပြီး သွေးလည်ပတ်မှုကို ကောင်းမွန်စေပါတယ်။ ဒါ့အပြင် ကိုလက်စထရောပမာဏကို ထိန်းညှိပေးနိုင်ပြီး နှလုံးရောဂါဖြစ်နိုင်ခြေကို လျော့နည်းစေပါတယ်။

• အိပ်စက်ခြင်းကို ကောင်းမွန်စေခြင်း

စိတ်ဖိစီးမှုနဲ့ စိုးရိမ်ပူပန်မှုတွေဟာ အိပ်မပျော်တဲ့ အဓိက အကြောင်းအရင်းတွေထဲက တစ်ခုဖြစ်ပါတယ်။ ယောဂလေ့ကျင့်ခန်းတွေဟာ စိတ်ကို တည်ငြိမ်စေပြီး စိတ်ဖိစီးမှုကို လျှော့ချပေးနိုင်တဲ့အတွက် အိပ်စက်ခြင်းကို ကောင်းမွန်စေပါတယ်။

• အာရုံစူးစိုက်မှုကို တိုးတက်စေခြင်း

ယောဂဟာ  စိတ်ကို ငြိမ်သက်စေပြီး အာရုံစူးစိုက်မှုကို မြှင့်တင်ပေးပါတယ်။ ပုံမှန် ယောဂလေ့ကျင့်ခြင်းဖြင့်  လက်ရှိလုပ်ဆောင်နေတဲ့အရာအပေါ်မှာ ပိုပြီး အာရုံစူးစိုက်နိုင်လာပါလိမ့်မယ်။

• စိတ်ပိုင်းဆိုင်ရာ ကျန်းမာရေးကို မြှင့်တင်ပေးခြင်း

ယောဂလေ့ကျင့်ခန်းတွေဟာ စိတ်ဓာတ်ကျခြင်း၊ စိုးရိမ်ပူပန်ခြင်းနဲ့ စိတ်ဖိစီးမှုတွေကို လျှော့ချပေးနိုင်ပါတယ်။ မိမိကိုယ်ကို ယုံကြည်မှုနဲ့ တန်ဖိုးထားမှုကို မြှင့်တင်ပေးပြီး ကိုယ့်ကိုယ်ကို ချစ်ခင်တန်ဖိုးထားတတ်လာစေပါတယ်။ 

• ကိုယ်ခံအားစနစ်ကို အားကောင်းစေခြင်း

 ယောဂလေ့ကျင့်ခန်းတွေဟာ ခန္ဓာကိုယ်ရဲ့ သွေးလည်ပတ်မှုကို ကောင်းမွန်စေပြီး ကိုယ်ခံအားဆဲလ်တွေရဲ့ လုပ်ဆောင်နိုင်စွမ်းကို မြှင့်တင်ပေးပါတယ်။ ဒါ့အပြင် ယောဂဟာ စိတ်ဖိစီးမှုကို လျှော့ချပေးနိုင်တဲ့အတွက် ကိုယ်ခံအားစနစ်ကို ထိခိုက်မှုနည်းစေပါတယ်။

• ကိုယ်အလေးချိန်ကို ထိန်းညှိပေးခြင်း

ယောဂဟာ ကိုယ်အလေးချိန်ကို ထိန်းညှိရာမှာလည်း အထောက်အကူပြုပါတယ်။ ယောဂလေ့ကျင့်ခန်းတွေဟာ ကယ်လိုရီတွေကို လောင်ကျွမ်းစေပြီး ခန္ဓာကိုယ်ရဲ့ ဇီဝရုပ်ဖြစ်ပျက်မှုကို မြှင့်တင်ပေးပါတယ်။ ဒါ့အပြင် ယောဂလေ့ကျင့်ခြင်းအားဖြင့် စားသောက်မှုပုံစံမှန်ကန်လာအောင် အထောက်အကူဖြစ်တဲ့အပြင် ကျန်းမာရေးနဲ့ ညီညွတ်တဲ့ အစားအစာတွေကို ရွေးချယ်စားသုံးဖြစ်ဖို့လည်း အားပေးပါတယ်။

• နာကျင်ကိုက်ခဲမှုတွေကို သက်သာစေခြင်း

အထူးသဖြင့် ခါးနာခြင်း၊ လည်ပင်းနာခြင်းနဲ့ အဆစ်အမြစ်ကိုက်ခဲခြင်းတွေကို သက်သာစေပါတယ်။ ယောဂကျင့်စဉ် 

တွေဟာ ကြွက်သားတွေကို ဆန့်ထုတ်ပေးပြီး နာကျင်မှုကို လျော့ပါးစေပါတယ်။

ယောဂကို ဘယ်လိုစတင်လေ့ကျင့်ရမလဲ။

• ယောဂသင်တန်းများ : ယောဂသင်တန်းတွေဟာ ယောဂကို စနစ်တကျနဲ့ မှန်ကန်စွာ လေ့ကျင့်နိုင်ဖို့ အကောင်းဆုံးနည်းလမ်းတစ်ခုပါ။ ကျွမ်းကျင်တဲ့ ယောဂဆရာတွေက မှန်ကန်တဲ့ ကိုယ်ဟန်အနေအထားတွေနဲ့ အသက်ရှူနည်းတွေနဲ့ စနစ်တကျ သင်ကြားပေးပါလိမ့်မယ်။

• အွန်လိုင်းယောဂ : အွန်လိုင်းယောဂသင်တန်းတွေဟာ အိမ်မှာနေရင်း ယောဂကို လေ့ကျင့်နိုင်ဖို့ အဆင်ပြေတဲ့ နည်းလမ်းတစ်ခုပါ။ YouTube နဲ့ အခြားသော အွန်လိုင်းပလက်ဖောင်းတွေမှာ ယောဂသင်ခန်းစာတွေကို အခမဲ့ သင်ယူလေ့လာနိုင်ပါတယ်။

ယောဂလေ့ကျင့်တဲ့အခါ သတိထားရမယ့်အချက်များ

• အချို့ ကျန်းမာရေးပြဿနာတစ်ခုခုရှိသူတွေ (ဥပမာ- အရိုးပြဿနာတစ်ခုခုရှိသူ) တွေမှာ  ယောဂစတင်မလေ့ကျင့်ခင် ဆရာဝန်နဲ့ တိုင်ပင်သင့်ပါတယ်။

• ယောဂကို စစချင်းမှာ ခက်ခဲတဲ့ ကိုယ်ဟန်အနေအထားတွေကို ချက်ချင်းမလုပ်ပါနဲ့။ ဖြည်းဖြည်းချင်းနဲ့ သင့်ခန္ဓာကိုယ်ရဲ့ အခြေအနေပေါ်မူတည်ပြီး လေ့ကျင့်ပါ။

• ယောဂလေ့ကျင့်နေစဉ်အတွင်း နာကျင်မှုခံစားရပါက ချက်ချင်းရပ်လိုက်သင့်ပါတယ်။ အတင်းအကျပ် လုပ်စရာမလိုပါဘူး။ 

• ယောဂကျင့်စဉ်တွေကို မှားယွင်းတဲ့ ပုံစံနဲ့ လေ့ကျင့်ခြင်းဟာ ဒဏ်ရာရနိုင်တာကြောင့် မှန်ကန်တဲ့ပုံစံနဲ့ လေ့ကျင့်ဖို့ အရေးကြီးပါတယ်။ 

• ယောဂရဲ့ အကျိုးကျေးဇူးတွေကို ရရှိဖို့အတွက် ပုံမှန်လေ့ကျင့်ဖို့ အရေးကြီးပါတယ်။

ယောဂဟာ ကိုယ်ရောစိတ်ပါ ကျန်းမာကြံ့ခိုင်ဖို့အတွက် အထောက်အကူပြုတဲ့ အလွန်ကောင်းမွန်တဲ့ လေ့ကျင့်ခန်းတစ်ခုဖြစ်တာမို့  ယောဂကို စတင်လေ့ကျင့်ပြီး ကျန်းမာပျော်ရွှင်တဲ့ ဘဝကို ပိုင်ဆိုင်နိုင်ကြပါစေလို့ ဆုတောင်းပေးပါတယ်။