မိန်းမကိုယ်ပိုးဝင်ခြင်း 

အမျိုးသမီးတွေရဲ့ မိန်းမကိုယ်မှာ ယားယံတာ၊ အနံ့ဆိုးထွက်တာ၊ အရည်ဆင်းတာ စတာတွေကြုံရပြီဆို ဒါတွေဟာ မိန်းမကိုယ်ပိုးဝင်ခြင်း ကြောင့် ဖြစ်နိုင်တာကို သတိပြုသင့်ပါတယ်။ 

မိန်းမကိုယ်ပိုးဝင်ခြင်းဆိုတာ မိန်းမကိုယ်မှာ ပုံမှန်မဟုတ်တဲ့ ဘက်တီးရီးယားပိုးတွေ၊ မှိုပိုးတွေ၊ ဗိုင်းရပ်စ်ပိုးတွေ ဒါမှမဟုတ် ကပ်ပါးပိုးတွေ ဝင်ရောက်ပြီး ရောဂါပိုးကူးစက်ခံရတာကို ဆိုလိုပါတယ်။ 

မိန်းမကိုယ်ပိုးဝင်ခြင်းကို ဖြစ်စေတဲ့ အကြောင်းရင်းတွေက ဘာတွေလဲ။

• ဘက်တီးရီးယားပိုးတွေကြောင့် ပိုးဝင်ခြင်း 

မိန်းမကိုယ်မှာ ရှိတဲ့ ဘက်တီးရီးယားတွေရဲ့ ပုံမှန်အချိုးအစား မညီမျှတဲ့အခါမှာ ဖြစ်တတ်ပါတယ်။

လိင်ဆက်ဆံတဲ့အခါမှာလည်း ကူးစက်နိုင်ပါတယ်။

• မှိုပိုးကြောင့် ပိုးဝင်ခြင်း 

မိန်းမကိုယ်မှာရှိတဲ့ Candida လို့ခေါ်တဲ့ မှိုပိုးတွေ ပုံမှန်ထက် ပိုပြီးပွားလာတဲ့အခါမှာ ဖြစ်တတ်ပါတယ်။

ကိုယ်ဝန်ဆောင်ချိန်၊ ဆီးချိုရောဂါရှိသူတွေ၊ ပဋိဇီဝဆေးတွေ သောက်နေသူတွေနဲ့ ခုခံအားနည်းနေသူတွေမှာ ပိုဖြစ်တတ်ပါတယ်။

တင်းကျပ်တဲ့ အဝတ်အစားတွေ ဝတ်ဆင်တာ၊ ချွေးထွက်များတာတွေကလည်း မှိုပိုးပွားမှုကို အားပေးပါတယ်။

• လိင်မှတစ်ဆင့် ကူးစက်သောရောဂါများ (Sexually Transmitted Infections – STIs)

ဂနိုရောဂါ၊ ဆီးပူညောင်းကျရောဂါ၊ ရေယုန်၊ ကြွက်နို့၊ ဆစ်ဖလစ် နဲ့ တခြားရောဂါတွေဟာ လိင်ဆက်ဆံတဲ့အခါမှာ ကူးစက်နိုင်ပါတယ်။ 

• တခြားအကြောင်းရင်းများ 
• ဓာတုပစ္စည်းတွေနဲ့ ထိတွေ့ခြင်း: ဆပ်ပြာ၊ ရေမွှေး၊ မိန်းမကိုယ်သန့်စင်ဆေးရည် စတာတွေကို အသုံးပြုတဲ့အခါမှာ မိန်းမကိုယ်ကို ထိခိုက်စေပြီး ပိုးဝင်လွယ်စေပါတယ်။

• ကိုယ်ခံအားနည်းခြင်း: ကိုယ်ခံအားနည်းနေတဲ့အခါမှာ ခန္ဓာကိုယ်က ရောဂါပိုးတွေကို ကောင်းကောင်းမတိုက်ထုတ်နိုင်တဲ့အတွက် ပိုးဝင်လွယ်ပါတယ်။

• ဟော်မုန်းအပြောင်းအလဲ: ကိုယ်ဝန်ဆောင်ချိန်၊ သွေးဆုံးချိန်တွေမှာ ဟော်မုန်းအပြောင်းအလဲတွေကြောင့် မိန်းမကိုယ်မှာ ပိုးဝင်လွယ်ပါတယ်။

• အတွင်းခံအဝတ်အစား: စိုစွတ်နေတဲ့ အတွင်းခံအဝတ်အစားတွေ၊ တင်းကျပ်တဲ့ အဝတ်အစားတွေကို အချိန်ကြာမြင့်စွာ ဝတ်ဆင်တာတွေကလည်း ပိုးဝင်လွယ်စေပါတယ်။

• သန့်ရှင်းမှုအားနည်းခြင်း: မိန်းမကိုယ်ကို သန့်ရှင်းအောင် မထားနိုင်တဲ့အခါမှာလည်း ပိုးဝင်နိုင်ပါတယ်။

မိန်းမကိုယ်ပိုးဝင်တဲ့အခါ ဘယ်လိုလက္ခဏာတွေ ခံစားရနိုင်လဲ။

•  မိန်းမကိုယ်မှာ ယားယံခြင်း ဒါမှမဟုတ် နာကျင်ခြင်း
• ပုံမှန်မဟုတ်တဲ့ အနံ့ဆိုးထွက်ခြင်း 
• ပုံမှန်မဟုတ်တဲ့ အရည်တွေ ဆင်းခြင်း (ဥပမာ – အဖြူရောင် အဖတ်ဖတ်လေးတွေ ပါတဲ့ အရည်ဆင်းတာ၊ အဝါရောင် သို့မဟုတ် အစိမ်းရောင် အရည်ဆင်းတာမျိုးတွေ ဖြစ်နိုင်ပါတယ်။) 
•  ဆီးသွားတဲ့အခါ နာကျင်ခြင်း ဒါမှမဟုတ် ပူခြင်း
• လိင်ဆက်ဆံတဲ့အခါ နာကျင်ခြင်း
• မိန်းမကိုယ်နဲ့ မိန်းမကိုယ်အနီးတစ်ဝိုက်မှာ ရောင်ရမ်းခြင်း စတာတွေက မိန်းမကိုယ်မှာပိုးဝင်တဲ့လက္ခဏာတွေဖြစ်လေ့ရှိတာမို့ ဆရာဝန်နဲ့ ပြသကာ ကုသမှုခံယူဖို့ လိုအပ်ပါတယ်။ 

မိန်းမကိုယ်ပိုးဝင်ခြင်းကို ဘယ်လိုကာကွယ်နိုင်မလဲ။

• သန့်ရှင်းရေးကို ဂရုစိုက်ပါ

မိန်းမကိုယ်သန့်ရှင်းရေးအတွက် ဆပ်ပြာပြင်းပြင်းတွေ၊ မိန်းမကိုယ်သန့်စင်ဆေးရည်တွေ အသုံးမပြုဘဲ  ရေနွေးနွေးနဲ့ ဆေးကြောသန့်စင်ပေးပါ။ အိမ်သာသွားပြီးတဲ့အခါမှာ ရှေ့ကနေနောက်ကို သန့်စင်ပေးပါ။

• အတွင်းခံအဝတ်အစားကို နေ့စဉ်လဲလှယ်ပါ။

ချည်သားနဲ့ ပြုလုပ်ထားတဲ့ အတွင်းခံအဝတ်အစားတွေကို ဝတ်ဆင်ပါ။တင်းကျပ်တဲ့ အဝတ်အစားတွေကို ရှောင်ကြဉ်ပါ။

• လိင်ဆက်ဆံတဲ့အခါမှာ အကာအကွယ်သုံးပါ

လိင်ဆက်ဆံတဲ့အခါတိုင်း ကွန်ဒုံးကို အသုံးပြုပါ။ အထူးသဖြင့် လိင်ဆက်ဆံဖော်များသူနဲ့ လိင်ဆက်ဆံတဲ့အခါ ပိုပြီးဂရုစိုက်ဖို့ လိုအပ်ပါတယ်။

• ကျန်းမာရေးနဲ့ ညီညွတ်စွာ နေထိုင်ပါ

ကျန်းမာရေးနဲ့ ညီညွတ်တဲ့ အစားအစာတွေကို စားသုံးကာ လုံလောက်စွာ အိပ်စက်အနားယူပြီး 

စိတ်ဖိစီးမှုကို လျှော့ချပါ။

• ပဋိဇီဝဆေးတွေကို ဆရာဝန်ညွှန်ကြားချက်မရှိဘဲ မသောက်ပါနဲ့

ပဋိဇီဝဆေးတွေကို လိုအပ်မှသာ သောက်သုံးပြီး ဆရာဝန်ညွှန်ကြားထားတဲ့ ဆေးတွေကိုသာ မှန်မှန်သောက်ပါ။

• ရေများများသောက်ပါ

ရေများများသောက်ခြင်းက ခန္ဓာကိုယ်ထဲမှာရှိတဲ့ အဆိပ်အတောက်တွေကို ဖယ်ရှားပေးနိုင်ပြီး ကျန်းမာရေးကိုလည်း အထောက်အကူပြုပါတယ်။

• ဆရာဝန်နဲ့ ပုံမှန်ပြသစစ်ဆေးပါ

မိန်းမကိုယ်မှာ ပုံမှန်မဟုတ်တဲ့ လက္ခဏာတွေ ခံစားရတဲ့အခါ ဆရာဝန်နဲ့ ချက်ချင်းပြသစစ်ဆေးပါ။ အထူးသဖြင့် ကိုယ်ဝန်ဆောင်ချိန်မှာ မိန်းမကိုယ်ပိုးဝင်တာက မိခင်ရော ကလေးကိုပါ ထိခိုက်နိုင်တဲ့အတွက် ပိုပြီးဂရုစိုက်ပြသဖို့ လိုအပ်ပါတယ်။ 

မိန်းမကိုယ်ပိုးဝင်ခြင်းက အမျိုးသမီးအများစု ခံစားရလေ့ရှိပြီး ဂရုတစိုက်ကုသမှုခံယူရင် ပျောက်ကင်းနိုင်တာကြောင့် ရှက်ကြောက်စရာမလိုဘဲ ဆရာဝန်နဲ့ သေသေချာချာတိုင်ပင်ပြသကြဖို့ အကြံပြုလိုပါတယ်။